Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
<<Dem. 47.43 | Dem. 47.47 (English) | >>Dem. 47.51 |
47.45καταπλεύσας τοίνυν , ὦ ἄνδρες δικασταί , ὡς οὐδενὶ ἤθελεν ἐπιτρέπειν ὁ Θεόφημος περὶ τῶν πληγῶν ὧν τότε ἔλαβον ὑπʼ αὐτοῦ , προσεκαλεσάμην αὐτὸν καὶ ἔλαχον αὐτῷ δίκην τῆς αἰκείας . ἀντιπροσκαλεσαμένου δὲ κἀκείνου ἐμὲ καὶ διαιτητῶν ἐχόντων τὰς δίκας , ἐπειδὴ ἡ ἀπόφασις ἦν τῆς δίκης , ὁ μὲν Θεόφημος παρεγράφετο καὶ ὑπώμνυτο , ἐγὼ δὲ πιστεύων ἐμαυτῷ μηδὲν ἀδικεῖν εἰσῄειν εἰς ὑμᾶς .
47.46παρασχόμενος δὲ ἐκεῖνος ταύτην τὴν μαρτυρίαν , ἣν ἄλλος μὲν οὐδεὶς μεμαρτύρηκεν , ὁ δὲ ἀδελφὸς καὶ ὁ κηδεστής , ὡς ἐθέλοι τὴν ἄνθρωπον παραδοῦναι , καὶ προσποιούμενος ἄκακος εἶναι , ἐξηπάτησεν τοὺς δικαστάς . δέομαι δὲ ὑμῶν νυνὶ δικαίαν δέησιν , ἅμα μὲν δικάσαι περὶ τῆς μαρτυρίας , πότερα ψευδής ἐστιν ἢ ἀληθής , ἅμα δὲ περὶ τοῦ πράγματος ἐξ ἀρχῆς σκέψασθαι .
47.47ἐγὼ μὲν τοίνυν , εἰς ἃ οὗτος κατέφυγεν τότε δίκαια , ἐκ τούτων οἴομαι δεῖν τὸν ἔλεγχον γενέσθαι , ἐκ τῆς ἀνθρώπου βασανιζομένης , ὁπότερος ἦρξεν χειρῶν ἀδίκων · τοῦτο γάρ ἐστιν ἡ αἴκεια . καὶ τοὺς μάρτυρας διὰ τοῦτο διώκω τῶν ψευδομαρτυρίων , ὅτι ἐμαρτύρησαν ἐθέλειν παραδιδόναι τὸν Θεόφημον τὴν ἄνθρωπον , οὐδαμοῦ τὸ σῶμα παραδιδόντος οὔτε τότε πρὸς τῷ διαιτητῇ οὔτε ὕστερον , πολλάκις ἐμοῦ ἐξαιτήσαντος .
47.48διπλῆν οὖν αὐτοὺς δεῖ δίκην δοῦναι , ὅτι τε ἐξηπάτησαν τοὺς δικαστὰς ψευδεῖς μαρτυρίας παρασχόμενοι , κηδεστοῦ καὶ ἀδελφοῦ , καὶ ὅτι ἐμὲ ἠδίκησαν , λῃτουργοῦντα μὲν ὑμῖν προθύμως , ποιοῦντα δὲ τὰ προσταττόμενα , ὑπηρετοῦντα δὲ τοῖς νόμοις καὶ τοῖς ψηφίσμασιν τοῖς ὑμετέροις . ὡς δὲ οὐκ ἐγὼ μόνος παρέλαβον παρὰ τῆς ἀρχῆς τοῦτον εἰσπράξασθαι σκεύη ὀφείλοντα τῇ πόλει , ἀλλὰ καὶ ἄλλοι τῶν τριηράρχων ἑτέρους εἰσεπράξαντο οὓς παρέλαβον , ἀνάγνωθί μοι αὐτῶν τὰς μαρτυρίας .
Μαρτυρίαι
Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
<<Dem. 47.43 | Dem. 47.47 (English) | >>Dem. 47.51 |